كيف تصطادين جوازة ؟

جواز الصالونات ..

طالما شعرت بالسخافة من هذه الفكرة على الرغم من موافقتي على مقابلة هؤلاء اتقاءا للمشاكل مع والدتي اللى نفسها تفرح بيا .

هذه النصائح مش مني نهائيا ولا ناوية أنفذهم لكن من أجل كل المهتمات جمعتهم من كل الطنطات اللي شاغلين نفسهم بإني أتجوز .

* صوتك ميطلعش  :

المقصود هنا أن تظهر الفتاة مدى رقتها وهدوءها والـ cuteness  اللى فيها عبر صوتها اللي مش مسموع وكأنها بتتكلم مع نفسها 

فمثلا يسألها العريس انتى خريجة دفعه كام

-  فترد عليه : صوصوصيو صو 

-  مش سامع 

-  صوصوصيو صو 

فطبعا يتحرج يسأل تاني عشان ميظهرش انه اطرش 

ودي ممكن نسميها الهروب التكنيكي بدل ما يمسك حاجة عليكي وكدا نبقى ضربنا عصفورين بحجر

عرفته انها كيوت ، خلعت من أسئلته بدل ما يطلع منها رد ميعجبوش ويطفش منها .

* انتي كائن بيتوتي بحت :

وهنا تتحول الفتاة من كائن مقضي حياته في الشارع إلى كائن مبيشوفش الشارع غير من البلاكونة .

فعندما يسألها الأخ عن مكان معين تسأله فين دا فيخبرها باسم الشارع لترد ببراءة : مش عارفة أصل مش بخرج غير مع ماما .

وهنا تظهر جوجل مابس المسجلة بعقلها لتضحك ضحكات شيطانية على هذا المغفل .

* أنتي كائن سطحي :

السطحية هنا رغم اقتناعي بأنها شتيمة لكنها صفة مطلوبة في الراغبة باصطياد عريس .

لتظهر أمامه كشخصية بلا شخصية .. بلا هدف ، مبدأها الأساسي البنت ملهاش غير بيتها وجوزها ومطبخها . لا تقولي مامي ولا بابي ولا أروح مشاوير وتبقى بيضه يامه .

*كائن مقطوع من شجرة :

عندك أصحاب ؟؟؟؟

لا أعلم ما سر الاهتمام الجماعي بهذا السؤال ولا أعلم أيضا تظهر الخيبة على وجوههم عندما يكون ردي : كتييييييييييير

لذلك استنتجت أن على الفتاة أن تكون وحيدة شريدة قاعدة في اوضتها تتفرج على المسلسل التركي ومستنية ابن الحلال ومعندهاش أصحاب .

فوجود الكثير من الصديقات أو حتى القليل معناه انك بتخرجي معاهم ، بتزوريهم ، بيزوروكي ، موبايلات وفيسبوكات وهترغوا سوا وتصدعوه .

وبالتالى اذا تكرم وتفضل وتنازل ووافق عليكي وانتى عندك اصحاب متستبعديش لو طلب منك بعد الخطوبة تقطعي علاقتك بيهم وخصوصا السناجل .

* دي النقاط الأساسية اللى بيركز عليها أي واحد جاي يعمل انترفيو معاكي عشان يشوفك تنفعي ولا لأ

أي حاجة تانية سيبيها للحاجة والدتك وهي هتتصرف ويقصد بها شرح مزايا البضاعة :

هادية ، بتسمع الكلام ، ملهاش رأي ، ملطشة في البيت ، بتطبخ أحسن من الشيف شربيني ، ملهاش طلبات ، موفرة ، بتطير ، مبتلمش حشرات ، بتنور في الضلمة .... إلخ إلخ .

بعد تنفيذ كل ما سبق أقدر أقولك مبروك لبستي ... احم ( الدبلة )