بالعربي

وداعا للعربية

توضيح بسيط
مقصدش العربية اللى بتقول بيب بيب
ولا العربية اللى هو الشعب العربي والوحده والحاجات اللى ودعناها من زمان
كل المقصود هو اللغه العربية

تفتكرو لو واحد من ضمن كلامه قال كام مصطلح بالعربية الفصحى هيتقال عليه ايه
اقولكو
اما معقد او عبيط

ليه اللغه العربية بقت لغه منبوذه مننا حتى فى الدراسة كارهينها
حتى القرآن لوووو فكرنا نقراه بنلاقى كلمات كتير منعرفش معناها
طبعا العيب مش فى القرآن العيب فينا احنا
هجرنا لغتنا ومشينا ورا التقليد وبقينا نقول بيس وهاي وسي يو لاتر وفاين ثانكس
امشي فى الشارع شوف عربيات الشباب وابقى قابلنى لو لقيت مكتوب عليها حاجة بالعربي غير الميكروباصات وعربيات النقل طبعا
شوف اسامي المحلات الطبيعي انك تلاقيها كلها اسامي انجليزية او فرنسية ولو لقيت اسم عربي هتلاقيه مكتوب بالانجلش

كل دا اتعودنا عليه عادى جدا ومعادتش بتفرق

اللى خلانى اكتب الموضوع دا بقى هو الآتى

كنت موجودة فى سوبر ماركت ولفت نظري مشروب مكتوب عليه Arab Lemo
قلت عادي الشركات العربية بتحاول تعمل حاجة زي شركة كوكاكولا علشان المقاطعه
مسكت الازازة
مكتوب عليها بالعربي (مشروب عربي 100%)
قلت الحمد لله
من الناحية التانية مكتوب عليها بالعربي بردو
آراب ليمو
لما هو عربي 100% ايه الحكمة ان اسمه يكون بالانجلش وعلى الرغم من ان اسمه آراب يعني عرب

طبعا حطيتها مكانها وخدت بريل

وسلملى على العربية
بيب بيب

Amy